Mashaqadan Ayaa dhalay?  

Maxaa dhalay dhibaatadan

dhashu ay ku sugan tahay

    dhaqan xumada qayb ka ah

Dhabarkooda jabisoo

Dib u dhigay korriinshaha

Dhammaan ubadka oo idil

Dhanwalbood ka eegtaba

Dhibaatiyo logooyaa

dhan walbaba ka haysoo

Isxilqaanki dhumisoo

Dhabta nolasha garabmarin

Maxaa dhalay dhibaatadan

Dhalinteenna xooga ah

Dhib yaraan la jiifaan

Oy ka dhowri howlaha

Dadkaloo dhaqaaqoo

Xilka dhabarka saartoy

Dhididkooda quutaan

Ka dhargaan waxay siin

Dhib la'aanna noolaan?

Dhimashana ku sogayaan

Maxaa dhalay dhibaatadan

Oday dhaqamadeennii

Dhibta wayn u mari jiray

Inay nabada dhaliyaan

Dhanqaryada ka dhowraan

Ku dhaqaan dad waynaha

Markii uu dhib wayn jiro

Ku dhaqaaqijiray howl

Dhanka fiican loo wado

Inay maanta dhiilliyo

Dhibta iyo xumaatada

Dhinaceeda doortaan

Dhaqankiina lumiyaan?

Maxaa dhalay Dhibaatadan

Oo dhaarta beenta ah

Dhib yaraanta loo mari

Haddaan madaxdu dhowrayn

Dhab ahaan u hayn karin

Ballantay ku dhaartaan

Oon laga dhabaynayn

Waxay dhaartu mudantahay

Dhaqan dowlo laga fili

Dhulkuna uu ku nabad gali

Dadkuna ay dhibaatiyo

Dhalanteedka kaga bixi?

Maxaa dhalay dhibaatadan

Kuwii qalinka dhuuxee

Aqoon dhumuc leh yeeshee

Dhadhansaday waxbarashada

Dhibaatadu markay timid

Madax dhaba ma'ay noqon

Dhulka way ka dhoofeen

Dhankooday cidleeyeen

Dhabbihii cilmigu falay

Dhankeesaba ma'ay dayin

Dhaban kaag ayaa dhacay

Iyo waxaan la dowrayn?

Dhab ahaan u eegoo

Dhan walbaba ka fiirshoo

U dhaadhiciya hoosoo

Maskaxduna ha dhuuxdee

Jawaab dhaba ayaan sugi

Oon ka dhowri wadartiin

Dhibyaraan fudayd iyo

Dhayal yaysan nagu marin

Dhibtu waa mid guud oo

Nolasheena dhaawici

Oo dhabarka jabin kari

Ama keeni dhimashaba