Cumar xasan Cali. Ilaahay ha u naxariisto

Cumar  xasan Cali.

Ilaahay ha u naxariisto,

 Ardaygennii sharafta lahaa Cumar Xassan Cali.

Oo gacan Ka xaqdaran ku dhintay

Maalinti Axadda 28 -12-2014. 

Dilkani waa dhacdo ku timid u kas Iyo maag,waxaana toogtay nin Ka tirsan Askarta  dowladda Soomaliya ,wuxuu  sagootinaayay Arday  kale ooy Ka wada yimaadeen Jaamicadda Moqdisho kuna naystay gurigooda oo ku yaalla xaafaddaa afarta Jardiino  Dagmada  yaaqshiid.

Wuxuu  diyaarinaayay imtixaankii Simistarka  koobaad oo billaabanayay todobaadkaas, wuxuu Ka mid ahaa kumannaan arday oo MU Ka tirsan loona diyaarinaayo dib u dhiska dalkeennaa Iyo hogaanka bulshadeenna.

Wuxuu ahaa Injineer  soo koraaya,si fiican u dhismaaya oo Ka tirsanaa kulliyada Injineerka  ee Jaamicadda Moqdisho.

Xanuun wayn ayaa Ka dhashay dhimashada Cumar oo taabtay ruux kasta oo Ka tirsan MU maxaayeelay arday walba wuxuu masalaayaa tiir adag oo Ka mid ah dhismaha ummadda oo u baahan aqoonyahan caafimaad qaba kana adag kaalintiisa.

Waxaan u sheegaynaa  kuwa hagardaamaynaya dalka in aannaan Ka aqbalayn  danta xun ay leeyihiin oo ah in laga daalo dib u yegleelka guri lagu nasto oo mustaqbalka carruurteenna damaanad qaada,waxaan isku samirsiinaynaa dariiqii Cumar in uusan duugmin   Soona  xirmin ,  kumanaanka nool Iyo kuwa dhalandoona ayaa dhammaystiri hawsha uu  ka tagay Cumar.

Waxaan leenahay waalidkiis  Iyo macallimiintiisii Iyo saaxiibadiisii Iyo qaraabadiisii  Ilaah  Samir haka siiyo. 

Waxaa khasaare qaba ka dilay oon hubo in uuna  nasanaynin aduun iyo Aakhiraba.

ولتعلمن نبأه بعد حين

Tixdan ayaa igu soo dhacday markaan maqlay geerida Cumar.

Kuwa nolasha dumiyoow

La dagaashan sharaftoow

Dalka ubixis dubanoow

Waxaad dooni fulintiis

Amaa diidi maan garan

Kuwa nolasha dumiyoow

Dalag baxa ku diranoow

Danta guud burburiyoow

Waxaad dooni fulintiis

Amaa diidi maan garan

Kuwa nolasha dumiyoow

Da'yarteenna soo kici

Dhiigooda daadshoow

Rajadooda dumiyoow

Waxaad dooni fulintiis

Amaa diidi maan garan

Kuwa nolasha dumiyoow

Duulkii aqoon wada

Dab iftiima noo hurin

Mugdigana u daawa ah

Inuu damiyo nuurkaas

Dadaal wayn ku bixiyoow

Waxaad dooni fulintiis

Amaa diidi maan garan

Midka dilay ardayganoow

Dhiigiisa daadshoow

Adigoo dirays Iyo 

Astaan dowladeed qaba

Wax dilkaagan waa faray?

Dacwadayda laliyoo

Dadka u sarreeyiyo

Madaxdaan u dirayaa

Jawaab dihin Ka sugayaa!!!