Muxaadaro aan u dhigay ardayda soomaaliyeed ee joogta Istanbul

Waalli qaybo badanaa!

Waalli qaybo badana!!!

Wuxuu ahaa nin kor u dhaafnay 60 sano, da'du way ka muuqatay, xanaag addoonsaday ayaa qariyay dadnimadiisii iyo wixii laga sugaayay isagoo kale, waxaa afkiisa ka soo baxaayay warar qallafsan oo qallocan kana yaabsaday dadkii goobtaa joogay dhammaantood, cidina uma jawaabayn, si yaab leh ayay dadku u fiirinaayeen war xumahaas u dulloobay farsamadiisa  ay addoonsatay qaab dhaqan ka leexiyay wadadii ku toosnayd Diinta iyo Dhaqanka labadaba.

Waxaa yaab lahayd markay dhammaan ka dareereen intii goobtaas joogtay, anoon wali garanin hubkan iska daba dhacaaya meesha lagu ridaayo, anna aan ka durkay oon isku mashquuliyay shaqo yar oo ii taallay, kalidiis ayuu daldalmaayay, wuxuu sii waday caydii iyo Af xumadii, dhidid ayaa aad uga qubanaayay dagaal kama danbaysana wuu ku jiray, waxba iskama badalin ilaa markaas.

Waxaan iswaydiiyay yuu ku xanaaqsanyahay uu la caytami hadda, inne waa laga kala tagay'e,? muddo aan yarayn markuu sii waday ayuu aad u daalay oo tabartii ka yaraatay, markaas ayuu si qaab daran u dhaqaaqay isagay ka muuqato murug iyo ciil.

Hareeraha intuu dayay ayuu u dhaqaaqay meel cedla ah oo ka fog dadkii uu ku caraatamaayay, waxaan soo aaday dhibanayaashii laku rafaaday caydooda, waxaan waydiiyay: Maxaad ninka isaga waabin waydeen ood isaga celin waydeen?

Waxay iigu jawaabeen sidan:

Waa nin ka xoroobay xishood iyo dadnimadiisii oo samayn kara wixii ku soo dhaca dhammaantii, taasina waa qayb ka mid ah waalida, ee miyaan waalannaa? Ma waxaad na leedahay si aan u samaynno waxan oo kale ka xorooba dadnimada?

Waxay I xusuusiyeen xaddiiskii Nabiga salaani dushiisa ha ahaatee ee macnihiisu ahaa:

( Haddaadan xishoonayn waxaad rabto samee) ruuxii akhlaaqda ka xoroobay wuxuu ka dhexbaxay wax kasta oo sax ah, oo wuxuu samayn karaa wax kasta oo ku soo dhaca isagoon ilaalinayn xadkii loogu talagalay

{إذا لم تستحي فاصنع ما شئت}صدق رسول الله صلى الله عليه وسلم

ويقول عليه السلام { الحياؤ من الإيمان}

Tixdan  (WARXUMOW) ayaa ugu soo dhacday iga gudooma akhyaaray.

War xumow wax baa dumin

Wadiiqaha aad qaadana

Walbahaar cabsi leh iyo

Wareer kama dhammaadee

Waallidu maxay tahay

Waxba aan la dhowrayn

Wareerkana la joogtayn?

Wanaag iyo jacal baan

Waligood hallaabayn

Waxna aan dhibayn abid

Waydii dad soo jiray

Wax aqoon u dheertahay

Waxaad qabanna ku saxa

Waanaday ku siiyaan

Wehel jooga kuu noqon

War xumadu dhib bay dhali

Wadnahaaga qay bay 

Waraabaha cunsiisaa

War xumada xanaaqaa

Waddo dhiig kar kugu ride

Waligii bogsoonayn

War xumada xanaaqaa

Waajibkii Ilaahay 

Wax khilaafsan kugu toli

wanaagii aad qabatay

Wasakhayn dhammaantiis

Wadadaad maraysay

Wax qarxiyo dhib kuu dhigi

Walaalaha is jecel bay

Woxoodoo dhan dumisaa

Wiilkii aad korisay 

Warmo kuugu dhiibtaa

Waalid iyo caruur bay

Wanaagooda kala gayn

Wadan nabad u joogay

Wareerkii dagaal galin

War xumow wax maad bi'in

Wasakhdaa aad kala diri

Warmihii ku dilayiyo

Wadkaagay abuuriye

Walbahaar ku noolow

Waligaa digtoonow

Wax ku dhiba ayaa jiri

Waligaana kula socon